काठमाडौं : प्रहरीले अवैध लागूऔषध सहित छुट्टाछुट्टै स्थानबाट आठ जनालाई पक्राउ गरेको छ ।
काठमाडौं महानगरपालिका-३१ सुकुम्बासीस्थित सडकबाट नियन्त्रित लागूऔषध फेनारगन २६ पिस, डाइजेपाम २६ पिस र नुर्फिन २६ पिस सहित ताप्लेजुङ घर भएका काठमाडौं महानगरपालिका-९ सिनामङ्गल बस्ने ३१ वर्षीय छिरिङ लामालाई मंगलबार दिउँसो प्रहरीले पक्राउ गरेको छ । प्रहरी वृत्त नयाँबानेश्वरबाट खटिएको प्रहरीले उनलाई उक्त लागूऔषध सहित पक्राउ गरेको हो ।
ईलाम, सूर्योदय नगरपालिका-६ कन्यामबाट अवैध लागूऔषध ब्राउनसुगर जस्तो देखिने लिसाइलो पदार्थ करिब ७ सय ७० मिलिग्राम सहित २ जनालाई मंगलबार दिउँसो प्रहरीले पक्राउ गरेको छ । पक्राउ पर्नेहरुमा सूर्योदय नगरपालिका-८ घर भई सोही नगरपालिका-६ कन्याम बस्ने मिक कुमार तामाङ र २३ वर्षीय सेवन गुरुङ रहेका छन् । उनीहरुले डेरा कोठामा ब्राउन सुगर सेवन गर्दै छन् भन्ने सूचनाको आधारमा प्रहरी चौकी हर्कटेबाट खटिएको प्रहरीले उनीहरुलाई उक्त पदार्थ सहित पक्राउ गरेको हो ।
बर्दिया, बढैयाताल गाउँपालिका-२ फुटाहाबाट अवैध लागूऔषध ब्राउनसुगर जस्तो देखिने खैरो पदार्थ ५ ग्राम ८ सय मिलिग्राम, ट्रामाडोल ५ ट्याब्लेट र नगद ७ हजार ५ सय रुपैयाँ सहित सुर्खेत वीरेन्द्रनगर नगरपालिका-११ बस्ने १८ वर्षीय किशोरलाई मंगलबार दिउँसो प्रहरीले पक्राउ गरेको छ । प्रहरी चौकी जमुनीबाट खटिएको प्रहरीले उनलाई उक्त लागूऔषध र नगद सहित फेला पारी पक्राउ गरेको हो ।
तनहुँ, आँबुखैरेनी गाउँपालिका-४ बेनिटारबाट नियन्त्रित लागूऔषध नुर्फिन ६८ एम्पुल, फेनारगन ६९ एम्पुल र डाईजेपाम ६९ एम्पुल सहित वागलुङ कालीखोला गाउँपालिका-४ बस्ने २२ वर्षीय नर बहादुर थापालाई मंगलबार दिउँसो प्रहरीले पक्राउ गरेको छ । सुनौलीबाट पोखरातर्फ आउँदै गरेको ग.२ ख ९९५ नम्बरको बसलाई अस्थायी प्रहरी पोष्ट मुग्लिनपुलबाट खटिएको प्रहरीले जाँच गर्ने क्रममा बसमा सवार उनलाई उक्त लागूऔषध सहित फेला पारी पक्राउ गरेको हो ।
नवलपरासी पूर्व, विनयी त्रिवेणी गाउँपालिका-२ बाट नियन्त्रित लागूऔषध फेनारगन २६ एम्पुल, नुर्फिन २७ एम्पुल र डाईजेपाम २७ एम्पुल सहित गैंडाकोट नगरपालिका-१ बस्ने २६ वर्षीय केशव घिमिरेलाई मंगलबार राति प्रहरीले पक्राउ गरेको छ । प्रहरी चौकी दाउन्नेबाट खटिएको प्रहरीले ना.७ ख ६०८१ नम्बरको बसलाई जाँच गर्ने क्रममा बसमा सवार उनलाई उक्त लागूऔषध सहित फेला पारी पक्राउ गरेको हो ।
दाङ, लमही नगरपालिका-९ शिवखोलाबाट नियन्त्रित लागूऔषध ड्रमाडोल ७ सय ८८ ट्याब्लेट सहित तुलसीपुर उपमहानगरपालिका-५ बस्ने २२ वर्षीय समिर परियार समेत २ जनालाई मंगलबार राति प्रहरीले पक्राउ गरेको छ । ईलाका प्रहरी कार्यालय अमिलियाबाट खटिएको प्रहरीले बा.०२-०३७ प ३७८८ नम्बरको स्कुटरलाई जाँच गर्नेक्रममा स्कुटरमा सवार उनीहरुलाई उक्त लागूऔषध सहित फेला पारी पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरेहको छ ।
